Gwenu dan Fysiau

Ar raglen The Choice bore heddiw roedd Americanwr o'r enw Nick Yarris yn adrodd ei brofiadau o fod ar death row wedi iddo gael ei gyhuddo ar gam o dresio a llofruddio dynes. Mae'n debyg bod llawer wedi bod ac yn parhau i fod yn yr un sefyllfa ond ddim wedi bod mor lwcus a'r dyn hwn i gael ei ryddhau.

Dechreuodd yr holl beth yn ôl yn 1981 pan gafodd ei ddal gan yr heddlu'n gyrru o dan ddylanwad cyffuriau ac alcohol. Oherwydd nad oedd yn ei lawn bwyll dyma fo'n ymladd gyda'r heddwas a rhywust achosodd i dryll yr heddwas gael ei danio, ond yn ffodus ni chafodd neb eu hanafu. Roedd mewn tipyn o drwbwl wrth reswm, a thra yn y ddalfa, gyda'i ben dal ar chwal, dyma fo'n honni i'r heddlu bod ganddo wybodaeth am lofruddiaeth roedd newydd ddarllen amdano yn y papur newydd. Cyn pen dim roedd yr heddlu wedi ei gyhuddo o'r llofruddiaeth a cafodd ei ddarganfod yn euog gan reithgor er bod dim tystiolaeth cadarn i brofi'r peth. Bu yn y carchar am 22 mlynedd nes llwyddodd brofi ei fod yn ddi-euog yn dilyn datblygiad mewn techneg DNA, ond hyd yn oed wedyn gorfodwyd iddo aros yn y carchar am 6 mis arall.

Mae modd ail-wrando'r cyfweliad radio yma. Mae'n stori rhyfeddol am sut lwyddodd i gadw ei hun rhag mynd yn wallgof ac esiampl o'r anghyfiawnder mae cymaint yn eu gwynebu.